Kumpulan Haiku Sunda Ganjar Kurnia

Banjarnagara
Banjar nyésakeun tineung
Nagara keueung

.

Geus tunggang gunung
Masih ngulinkeun gandrung
Mulang ditundung

.

Di leuwi kréatif
Pangarang ngojayken idé
Lup lep pucunghul

·

Kebat jorélat
Ngembat mapay duriat
Keukeuh tibelat

Nagara runtag
Kaurugan sarakah
Ra'yat tahlilan

Néangan enya
Dina éntépan batu
Ngamalir duka

.

Di gunung Padang
Cenah mapaykeun wanci
Duka téh teuing

Lamun Andika
Rék ngagunasika
Kuring layanna

.

Nandonkeun ajén
Lalaki Padjadjaran
Tanjeur jajatén

.
Papatong eunteup
Dina régang talimbeng
Aya salira
..
Kapéngpéongan
Ku enyay duriat maya
Leuwih kasiksa
..
Ukur sorangan
Ulin batin kasugan
harepan, biheung
.
Jalu perlaya
Ditilas ku lamunan
Teu walakaya
.
Jajatén Ukur
Getih pangkur ngagedur
Sunda sing punjul
.
Kembang laligar
Di sisimpangan jalan
Umur ngiceupan
.
Layar belewuk
Urang jadi kalangkang
Éra jeung wirang